سنة أولى جامعة | تحضيري

"لا تنتظر ريحًا تُحرك ساكنًا
زمجر بنفسك واصنع الاعصارَ.." ❤

16 | 9 | 2017 

- مرحلة انتقالية جديدة، تجربة فريدة من نوعها من ناحية: البيئة ، ماهية المواد ، وحتى النمط الاعتيادي اليومي. 

السنة التحضيرية للمسار الصحي في جامعة الامام عبدالرحمن بن فيصل - الدمام سابقًا - تنقسم إلى فصلين دراسيين وتندرج المواد إلى قسمين :
- مواد سنوية مثل : الفيزياء ، الأحياء ، الكيمياء ، اللغة الإنجليزية.
الدرجات النهائية والتقدير لهذه المواد لا تظهر إلا في نهاية العام. ندرس عدة محتويات للمادة في كل من الترم الأول والثاني.
الأحياء (Biology) : الترم الأول تطرقنا لعدة فصول وهي: Characteristic of life - Chemistry of living things - Structure and function of cell - Histology - Cell reproduction and differentiation track - Genetics and inheritance .
 وكان عليه 5 وحدات بالمعدل يعني من المواد اللي ترفع المعدل ، أو تنزله..فركزوا عليه وعطوه حقه 💪
البايو من المواد اللي تعتمد على الكتاب الدراسي وليس فقط السلايدز، لأن المعلومات اللي فيها نحتاج نتعمق فيها نوعًا ما بسبب المسار وتركيزه على هذه المادة وعشان لما نتخصص تكون عدنا معلومات كافية و وفيرة وغير سطحية.
عدنا محاضرة ناخذها مرتين في الاسبوع، ولاب - معمل - مرة كل إسبوعين يعني سلمكم الله عدنا أسابيع زوجية وفردية مثلًا الإسبوع الأول والإسبوع الثاني بتنقسم الشعب ناس تاخذها الإسبوع الأول - الثالث - الخامس والشعب المتبقية تاخذه في الأسبوع الثاني - الرابع - السادس..إلخ وهكذا

نختبر مد - يكون مرة كل ترم - الدكاترة يحددوا ليكم كم جابتر بيدخل في المد وما إلى ذلك ، وعدنا كويز نختبره اون لاين على البلاك بورد واحنا بالبيت الحليو بالموضوع إن تضمنوا درجات وانتون مرتاحين -بإذن الله- لأن يمديكم تفتحوا الكتاب والسلايدز وكذا أو تتساعدوا فيما بينكم وعدنا فاينل تختلف الدرجة عادةً بين الترم الأول والثاني هذا بالنسبة حق المحاضرة - النظري - لكن اللاب - عملي - أتوقع انكم متعودين على الاختبارات العملية في المدرسة بعد فمو شيء جديد عليكم صح؟ 

اللاب بالنسبة لي رائع لأن يكون زي مراجعة للجزئية النظرية اللي أخذتوها بالمحاضرة والحليو في الموضوع إن بتطبقوا والتطبيق يثبت المعلومة أكثر من لما بس تكون نظري وتحفظوها وتنسوها بعدين، طبعًا اللاب بكون عندكم مجسمات ونماذج تساعدكم في تفحص  العضو اللي بتدرسوه أو الخلية وهكذا وعدنا اختبار نهائي في اللاب والحمدلله بالنسبة لي أسهل من النظري يكون وأخف منه نصيحة ليكم، لما يجي الوقت اللي تختبروا فيه لا تقولوا عملي وبنذاكر حزة الحزة لو قبل الاختبار بليلة .. أبدًا لا! إحنا الحين في جامعة مو نظام مدرسة، ذاكروا قبل الوقت بمدة لأن مابكون عندكم يومها بس هذا الاختبار..عادي عندكم اختبارين بنفس اليوم؟ 
وعشان يمديكم تراجعوه خصوصأ إن يبغى له تركيز لأن بتاخذوا الانسجة في الجسم لكل عضو، وكيف شكلهم ومعظمهم يتشابهوا فيحتاجوا تركيز وإعادة على المذاكرة عدة مرات عشان توصلوا للدرجة اللي تتمنوها إحنا كنا كل ترم نختبر والفاينل من 10 نهاية السنة يصير التوتال حقهم من 20 

الفيزياء (Physics) : عليه 3 وحدات بالمعدل..تطرقنا لعدة مواضيع منها : Units - Vectors - Motion in one dimension - Forces and Newton's laws of motion - Dynamics - Equilibrium  -  Elasticity - Energy and work 
يمكن بعضكم سمع إنه الوحش بالنسبة لطلاب وطالبات تحضيري؟ 😂 
عادي كلنا مرينا فيه وعديناه الحمدلله وترى معظم اللي بتاخذوه دارسينه في المدرسة، زي الزخم، الازاحة، التسارع بس يبغى ليها شوي تركيز وتوسعوا - مدارككم - يعني ماتنظروا للشيء بسطيحة أو تاخذوا - القشور - فحسب لأ، الدكاترة سياستهم يبغوا يعرفوا من اللي فاهم ومن اللي مركز بس بالسلايدز ومذاكرته - مش ولا بد - حاولوا تطلعوا على التجميعات لأن تكرر ، وترى سياستهم بعد ان يصعبوا الموضوع بعدين في اخر اختبار في السنة في الترم الثاني يكون - ماي - والكل يطلع مستانس ويجيبوا أسئلة من السلايدز 
حاولوا تجمعوا درجات من البداية، ولاتشتتوا أنفسكم في أكثر من مرجع مثلًا كانوا عدنا طالبات يذاكروا في أكثر من اسايمنتز من عدة دكاترة سواء من قسم الطالبات او الطلاب ومع الأسف انكبوا لأن الدكاترة جابت لينا أشياء سطحية وتنحل بسهولة، فالبنات من ركزوا على الصعب وسحبوا على السهل بالتالي نسوا كيفية حل الأشياء السهلة ، يعني بإختصار عدهم فن تلاعب القسم حاولوا تعرفوا وش خطتهم لكل مد وعلى إيش ركزوا ، شاهدوا مقاطع دكتور نزيه كانت رائعة بالنسبة لي وتسهل عليي، طريقتي لمذاكرته كنت أشاهد شرح الدكتور وأكتب ملاحظاته وملاحظات دكتورتي، وبعدين اذاكر السلايدز لحالي والشيء اللي سهل عليي أكثر بعد إن كنت أطلب مساعدة من زوجي وكان يبسط المعلومة لي بحيث أفهمها بسرعة 💓
الفزكس  : مد واحد كل ترم وفاينل ، ولاب وعدنا فاينل اول ترم كان من 4 درجات والترم الثاني من 6 فالتوتال كان من 10 نهاية الترم ، ومحاضرة كل أسبوع مرة .

الكيمياء (Chemistry) : عليه 3 وحدات بالمعدل..الكل يجزم إن طاقم قسم الكمستري الأفضل ، روحهم حلوة وطيبين ويساعدوكم من قلب معظم اللي درسناه، كنا دارسينه بالمدرسة اللهم أكثر تعمق نوعًا ما واللغة تختلف طبعًا بس سلسة وسهلة كانت حتى ما احتجت اترجم واجد في هذه المادة المواضيع اللي أخذناها كالتالي : Chemistry and Measurements - Atoms and periodic Table - Ionic and Molecular Compounds - Chemical reactions - Acids and Bases . 
نصحية للطالبات: إذا شيء مو فاهمينه أو نسيتوه مع الأيام .. روحوا في الساعات المكتبية للدكاترة وبساعدوكم بكل رحابة صدر عندكم ، د.أسيل د.نسرين د.فاطمة أبو زيد رائعين يا بنات درسوني كلهم وشرحهم بيرفكت . 

الجدول كان : محاضرة وحدة كل أسبوع ، وكل أسبوعين ناخذ لاب وعدنا مد كل ترم وفاينل 

طبعًا الثلاث المواد العلمية يشتركوا كلهم في إن عدنا مد واحد وفاينل كل ترم، بالإضافة الى كويزز تتقسم على الترمين ، واسايمنتز واغلبهم الاسايمنتز يكون الدرجة على التسليم وليس الحل وحلوه بنفسكم عشان يساعدكم للمذاكرة للمد او الفاينل وتعرفوا ماهية الأسئلة المتوقعة بالاختبارات .  

فيه سمة حلوة في هذه المواد إن يصير روتيشن كل ترم للدكاترة، يعني مثلًا لو لا سمح الله اللي تدرسكم شرحها مو عدل إن مابتظل وياكم كلا الترمين وهكذا 

اللغة الإنجليزية ( General English ) : أهم مادة بكل تحضيري عليها 7 وحدات بالمعدل ، فعلًا يا ترفع المعدل يا تنزله..وزعوا أكبر جزء من طاقتكم عليها بتتقسموا على حسب مستواكم في اللغة ، بيقنر ، انترميديت ، ادفانس .. وبناءً على ذلك  بيتحدد تدرسوا كم كتاب .. اذا ماكنتوا ادفانس بتدرسوا Book 3 أما اذا كنتوا ادفانس بتبدوا في Book 4 
حاولوا تحفظوا الفوكاب اول ماتاخذوهم، تحلوا IQ والكويزز من البداية مرة قبل المد! عشان ماتوصلوا لفترة المدات وتتراكم عليكم كل هذه الأشياء ولاتستهينوا بها أبدًا! لأن عليها درجات..حطوا في بالكم كل شيء في الجامعة مهم مو نفس المدرسة تمشوه وتسحبوا عليه - حتندموا واللهِ - 😉
بالنسبة للجدول ، يعتمد على مستواكم أني مثلًا كنت كل يوم آخذ كلاسين - باليوم - وفي يوم بس كلاس مثلًا 

- نقطة أخيرة كونوا على علم إن الأسئلة يكتبوها الدكاترة من قسم الأولاد ، فهذا يعتبر شيء مُبهم يعني هم ما بدرسونا فما نعرف كيفية الأشياء اللي ركزوا عليها مع طلابهم أو إيش خطتهم ، أو هل لمحوا لشيء أو لا 

انتهينا من المواد السنوية للترم الأول 💥

- مواد فصلية : ندرسها فقط في الترم مرة واحدة وتنزل ليها درجة مستقلة كل ترم والتوتال من 100 مثل : Computer - ISLM - LRSK 

الكمبيوتر (Computer) : تطرقنا لعدة مواضيع منها Introduction to computer  - Introduction to Health information system -Microsoft Excel 2016 - Microsoft Access 2016 

عليها وحدتين بالمعدل 

كان أول كويز بالمرحلة الجامعية في مقرر الحاسب ، عليه 5 درجات وكل دكتورة تكتب الأسئلة لطالباتها .. فشوفوا اللي يدرسكم على إيش كانوا يركزوا أثناء المحاضرة؟ وبعدها مد مرة وحدة كان عليه 30 درجة و فاينل نهاية السنة جزء نظري وجزء عملي وكنا نطبق على البرامج ونرسلهم للي تدرسنا وتقيمنا وعدنا مشروع وقد عطونا اسايمنت عليه 5 درجات وكنا ناخذ محاضرتين في الاسبوع 

في المشروع حاولوا تنتقوا طالبات يساعدوكم، مو طالبات يرموا الشغل على طالبة وحدة بحيث العبء يكون عليها وهم مرتاحين لأن ممكن - تكونوا إنتون هذه الطالبة اللي بتسوي كل شيء - 


مهارات التعلم والبحث ( Learning and Research Skills )  : المادة بشكل عام كانت محاورها عن المواضيع اللي تفيد في الحياة مثل الانتقال للمرحلة الجامعية عن تنظيم الوقت التعلم الجماعي والفردي والتفكير النقدي والبحث باختصار أشياء بسيطة وتعرفوها ومعتادين على أغلبها المقرر كان خفيف ولطيف وندرسه مرة بالإسبوع وكان عدنا نسوي بحث جماعي فيه وتساهلوا ويانا الدكاترة وكان حلو وخفيف على القلب وبتضمنوا بإذن الله درجات فيه ، صار عدنا اول كويز ورقي بعدين صار الكتروني اون لاين بالبيت على البلاك بورد وماعدنا - مد - انبسطوا 😎 بس نصيحة لاتهملوا المقرر بحيث تراكموا على أنفسكم وقت الفاينل ويصير كأنكم تفتحوا الماد أول مرة وقت الفاينل لأن تحتاج جهد مهما كان .. حاولوا بالكويز تتطلعوا على المحاضرات وتقروها وتذاكروها ، ركزوا على التعداد لأن بالفاينل جانا - مقالي مو كل اختياري - وبالإنقلش طبعًا بس كان صراحة سهل وتضمنوا درجات برضو وكانت سلسلة اجاباتهم تقدروا تعبروا بكل أريحية .. كان 12 سؤال مقالي تختاروا 6 أسئلة اللي تحسوهم سهلين ليكم وكل سؤال كان عليه درجتين 

عليها وحدتين بالمعدل 



العقيدة والأخلاق ( Islamic ) : المقرر الوحيد اللي بتدرسوه باللغة العربية يحق ليكم تتنفسوا تنفس الصعداء يا أصحاب لأن جد ماتشيلوا هم كيف بترجموا المحاضرة، كيف بتفهموا ، وعدة أمور كان سلسل وكلها أشياء معادة من الابتدائي..متصورين؟ زي اركان الايمان ، أنواع التوحيد ، أنواع الكفر .. جدًا أشياء سهلة وسلسة وغير معقدة الفهم .. بالإضافة عدنا جزء حفظ قُرآن من الناس إلى الأعلى 

نصيحة حاولوا تحفظوا من البداية أكثر مدة لين أول شهر من الدراسة عشان ماتجي فترة المد إلا وانتون مسمعين وترتاحوا ماتشيلوا هم كيف بتذاكروا مد ، وكيف بتحفظوا وبيتشتت مخكم ، طبعًا فيه دكاترة تسوي ددلاين وبعضهم يخليه مفتوح، دكتورتنا هبة، الله يذكرها بالخير كانت تحط لينا وقت معين وبالنسبة لي كان جدًا مفيد لي لأن أحفظ بالبداية وأكون شبه فاضية ماعندي مد ولا زحمة مهام فأتفرغ للحفظ وأسمع وأنتهي بكل أريحية 

وبكذا الحمدلله انتهينا من مواد المستوى الأول ، الله يوفقكم ويسهل دربكم وينولكم أعلى الدرجات 💛

نصيحتي ليكم يا أصدقاء ، أول ترم دائًما يكون أصعب ترم بحكم إن توكم بالبداية، كل شيء جديد عليكم ، حاولوا تتعلموا من تجارب وأخطاء غيركم وتتفادوها، عشان تجتازوا هذا الترم بكل قوّة..حاولوا تجمعوا أكبر قدر من الدرجات لأن مع بالغ الحزن مسارنا بحكم عدنا مواد سنوية ودرجات الترم الأول مرتبطة بدرجات الترم الثاني فمثلًا : لما أنقص خمس درجات الترم الأول ونجي للترم الثاني وأجيب درجات عالية بس ستل أنقص درجة\درجتين ينجمعوا هذه الدرجات اللي خسرتها مع الخمس درجات من بداية الترم وينقصوهم من التوتال 💔😢

فحاولوا ما تخبصوا من البداية وما تهملوا أي مقرر وفالكم التوفيق 🌿

المستوى الثاني في السنة التحضيرية بجامعة الإمام عبد الرحمن بن فيصل للمسار الصحي

شعار المرحلة كان : 

" لقد حاولوا دفننا..لم يعلموا أنَا بذور." 🌱

قبل ما نخوض في المواد وماهية المحاور اللي بندرسها و الوحدات والمتطلبات وما إلى ذلك ، لازم تعرفوا يا أصدقاء إن المرحلة الجامعية مرحلة مختلفة جذريًا، بتتعرضوا لعدة خيبات ، عثرات ، أوقات مابتعرفوا إنتون فعلًا وش المبتغى من هذا كله؟ ما هو ميولك إلى التخصص الفلاني؟ هل فعلًا بتقدر وبتجتاز كل هذا أو لا؟ بعض الأوقات شعرت فيها إن أبغى أنهي هذا كله وإن الخيبات تراكمت علي لكن الحمدلله الأشخاص القريبين منكم هم اللي يخلوك تؤمن \ تؤمني إن الله سوف يمطر هذه التراكمات خيرًا وتوفيق وما يناسبك أنت، ما سوف تتصالح معه في نهاية المطاف، لذلك دع البؤس والكسل، وانطلق إلى مستقبلك بنفسك..تذركوا هذه العبارة " شمّر على يديك واطلب المتاعب هذه هي الحياة." صدقوني مافي شيء سهل ولا في حاجة توصلنا على طبق من ذهب 

إحنا واللي أكبر منا واللي تخرجوا كلنا مرينا بفترات صعبة وتوقعنا أننا لن نتجاوزها ولكن " تمر عليك ظروف تشعرك أنها لن تنقضي ، وأنها هي القاضية عليك. اليوم قد مرّت و ولّت بلطف الله، بطريقته لا بطريقتك وتدبيره لا تدبيرك.."

سبحانك يا الله، دائمًا يعطف علينا ويجعل لطفه ينهال علينا تمامًا كما لو أنّه مطر. 

نبدأ بسرد المواد التي من خلالها ومن خلال الجهد الذي بذلناه والذي سوف يحدد لنا المستقبل، التخصص الأنسب والأفضل لك والذي من خلاله سوف تكون سببَا لإنقاذ روح، لمساعدة مريض، لتخفيف عناء مُصاب..لاكتشاف داء يشفي عليل. 

الأحياء (Biology) : الترم الثاني تطرقنا لعدة فصول وهي : Blood - Heart and Blood vessels - Immune System and Mechanisms of Defense - The Nerve system - The respiratory System - Digestive System - The endocrine system - The urinary system 

وتلاشيًا للتكرار مثل الترم الأول اللهم اختلاف في المواضيع..بالنسبة لي الترم الثاني كان أحلى ما أعرف هل هو اعتدت على النظام وفهمته أو بسبب المحاور اللي تطرقنا ليها أو عشان الدكتورة وشرحها كان رائع؟ الجابترز اللي اخذناهم أحس فتحت مخي، يعني بتخليكم تعرفوا ميولكم كان لأي نظام أو أي جهاز؟ وبناءً عليه بتعرفوا ميولكم للتخصص، مثلًا The respiratory System لو حبيتوه وحسيتوا عندكم ميول نحوه أكثر من بقية الأجهزة أو الأنظمة..بتعرفوا إن عندكم ميول لتخصص الرعاية التنفسية بحكم إنه يركز على هذا الجهاز والنظام على الأرجح بشكل كبير وهكذا.

الفيزياء (Physics) : درسنا يا طويلين العمر عدة فصول منها : Fluids - Heat Transfer - Waves - Electricity 

طبعًا الجابترز قليل بس كل جابتر فيه عدة أجزاء وأكثرهم الفلويد كان 5 أجزاء ألا وهي - الموائع - ماخذينها بالمدرسة بس طبعًا غير عن المدرسة - هذا كان زمان - 😂 كنت اتضايق منه أقول طيب وش دخلنا؟ خصوصًا لما عرفت إن اللي في تخصص الهندسة يدرسوه بشكل عميق أكثر لكن إحنا الحين ندرسه من الناحية اللي تخدم مسارنا - المسار الصحي - زي المغذي وقياس الضغط طبعًا بيتبادر في ذهنكم وش جاب لجاب؟ بس بعدين بتعرفوا الحبكة  

وبإذن الله الفاينل حقكم بكون جدًا سهل و بتحافظوا على القريد حقكم عشان توافوا شروط الكليات اللي بتتخصصوا فيها بعدين ولا تحاتوا ان شاءالله ما يكون عندكم - رسوب - بعيد الشر عنكم 💁

الكيمياء (Chemistry) : فاكرين الكيمياء العضوية؟ الاستر، الايثر ، الكحول ؟ كلها أشياء بتنعاد عليكم اللهم فيه تعمق بالموضوع شوي وعشان أخليكم مستوفيين لأغلب الأشياء المواضيع اللي درسناها كانت كالتالي : Introduction to Organic Chemistry Hydrocarbons - Alcohol - , thiol and ketone  - Carbohydrates - Carboxylic Ester Amides - Amino Acids and Proteins . 

نصيحتي ليكم ركزوا على كل جابتر وكل جزيئة أول بأول .. وش الجديد؟ الجديد إن بتحسوهم سهلين ومعتادين عليهم وفاهمينهم لكن اللي بصير وقت الاختبار بتحسوا كلهم يتشابهوا كل المجموعات الوظيفية متماثلة، فلازم تفرقوا بينهم قبل المد والفاينل . 

الحليو في لاب الكمستري ان بكون عندكم كويز كل ترم أو مرة بالسنة الدراسية مو متأكدة صراحة، والفاينل عبارة بعد كل تجربة الأسبوع اللي يليها تختبروا فيها ولاتشيلوا هم الدكتورة بتطبقها وياكم، وبتخليكم تسووها جماعي وبعدين الأسبوع اللي يليه بتختبروا فيها نفس الطريقة نفس كل شيء وجماعي اللهم كل وحدة ورقتها لحالها وكل وحدة تسوي شغلها لحالها 💡

اللغة الإنجليزية ( General English ) : بعضكم بخلص Book 3 وبينتقل لـ Book 4  ولكن في نهاية المطاف جميع المستويات بتدرس Book 4 وبتاخذ كم يونت من Book 5 ولا تشيلوا هم Book 5 بيدخل وياكم في المد بس ويمكن أول أو اول ثنتين يونت بيدخلوا في الفاينل بالإضافة إلى Book 4 كامل لذلك ركزوا عليه ، ولأن قسم الانقلش عادةً يكون اول مد عليه 10 ثاني مد 10 ثالث مد برضوا 10 بالإضافة الى درجات الاساي - مقال - IQ - الكويزز ولكن العبء والثقل الأكبر على الفاينل نهاية السنة بكون عليه 50 درجة فيا تصيب يا تخيب مع الأسف 

على بركة الله طلعتوا من الشر وخلصنا من المواد السنوية ككل 🎈

المواد الفصلية لهذا المستوى : ENGL 102 - LRSK142 - PHEDU - ISLM 272

لغة انجليزية تخصص ( ENGL 102 ) : تنقسم إلى قسمين : 

• EAP : بتدرسوا فيه قرامر + بخلوكم تكتبوا عدة أنواع من الـ Essay  - مقالات - ومعظمها مكرر في ENGL 101
• ESP : بكون عندكم مصطلحات تتعلق بالتخصصات اللي بتتخصصوها ان شاءالله، مثل المصطلحات اللي نستخدمها والمتعلقة في الصيدلة ، طب الأسنان ، صحة عامة وهكذا ونفس الشيء واجد مصطلحات مكررة بس ركزوا عليهم لأن واجد  

هذا المقرر عليه 3 وحدات بالمعدل ، نختبر له مدين ، واحد بالبداية و واحد بالنهاية وفاينل الكل يجزم إنه أسهل من الجنرال انقلش وأخف منّه وبتستمعوا فيه ليش؟ لأن انتون قاعدين تدرسوا شيء يندرج تحت مساركم حتى غلاف الكتاب كان يحمّس حقنا كان عليه ستيثوسكوب - سماعة طبية - الشعور بحد ذاته ان في حوزتش هذا الكتاب رائع .. وش الحسنة من إن عدنا 2 مد ؟ إن مايجي الفاينل إلا إحنا ومختمين المقرر ومذاكرينه كامل فيصير بالفاينل زي اللي بس تراجعوا عليه - لأن مفروض تكونوا مذاكرينه من قلب صح ولا لا ؟ - 

التربية البدنية (PHEDU ) : أتعب وأني أقول خفيفة على القلب وأعتبره كلاس - ترفيه عن النفس وترويحًا لها - بتدرسوا جزئية نظري عن الرياضة للحامل مثلًا ، الجروح أنواعهم وكيف تداووهم ، الـ CPR ، أثر الرياضة على الجسم وأشياء تواجهكم في الحياة ومو جديدة عليكم ، والجزء العملي تسووا انعاش للقلب على دمى ، رياضة وطبعًا كل شيء عليه درجات يعني ماتسووهم عبط ، ممكن تخافوا شوي من الجزء العملي عشان له وقت محدد وعدد معين تسووه مثلًا الست اب كان لازم 20 مرة + نسويها في مدة 30 ثانية ، أو القفز كان نقفز 150 سم + لكن كلها بتسووها بإذن الله وبتجيبوا A+ طبعًا هي المقرر الوحيد  اللي عليه - وحدة واحدة - في المعدل ولكن  هذا مايعني إن تستهينوا فيها وتهملوها! صحيح إنها باللغة العربية وبتستانسوا لكن لا تهملوها لأن كميتها كبيرة واوقات بتحسوا مابتستسيغوا المعلومات بسبب حجمها الهائل لذلك أعطوا كل شيء حقه بلا زيادة أو نقصان .. وبتستمعوا صدقوني 🍨 

مهارات التواصل ( LRSK 142 - Communication Skills ) : عليه وحدتين بالمعدل وماعدنا مد ، عدنا كم كويز اون لاين على البلاك بورد ، وفاينل نهاية الترم ومشروع سوينا هدايا لعاملات التنظيف في المبنى حقنا والمواضيع اللي درسناها كلها خفيفة وأخف من الترم الأول ومعتادين عليها كيف الواحد يتصل ويا زملائه في العمل؟ مع الدكاترة؟ عن طريق الإيميل ، البلاك بورد وكذا يعني مرررة حلوة وسهلة ولطيفة وإذا كانت شعبتكم رائعة، وحبتكم الدكتورة، بتدرسكم في كلا الترمين..أني درستني دكتورة آمال يونس الله يذكرها بالخير كانت متعاونة جدًا ويانا وتراعينا 

الإسلام وبناء المجتمع ( ISLM 272 ) : عليه وحدتين وعدنا جزء قرآن من بعد الأعلى إلى نهاية الجزء الثلاثين 

كان حلو وسهل وكل الاحكام المتعلقة بالحياة والمجتمع مثل النكاح والخطبة والفرق بينهم واحكامهم ، الطلاق ، الخلع ، حكم الهدايا ، الرشوة وهكذا وكان عدنا مشروع قيمي عن اي قيمة - الإخلاص - الصدق .. الخ - سوينا مقطع فيديو بحكم إنه أسهل وكنا مشغولين بس فيه مسيرة وحملة شوفوا الأنسب ليكم والوقت وسووه ، وعدنا مد وفاينل مافي كويز طبعًا الشيء المختلف في مواد الدين عن البقية إن كل سؤال بدرجة وفيه مقالي واختياري ، لذلك لاتستهينوا فيه في الاختبار لأن كل سؤال تغلطوا فيه تنقصوا درجة كاملة عكس البقية مثلًا نص ربع وهكذا 

وبكذا خلصنا مواد المستوى الثاني وشطبنا على سنة تحضيرية! واجتزناها وعديناها ولله الحمد على عظيم عطاياه 💛 

للأمانة وبكل صدق الاقتباس الذي يصف سنة تحضيرية بعد ما أنهيتها حرفيًا هو : 

"وأنا أُجرجر هيكلًا متعثرًا نخِرًا تلِف، أقتادُ روحًا هدها الترحالُ أرهقها التوغلُ والأسف.."

كانت سنة متعبة، سنة تحدي بالنسبةِ لي .. ولكن الحمدلله كوني مختارة الأشخاص المحيطين من حولي بشكل صحيح، الأشخاص التي تبث الثقة في نفسي، تذكرني مرارًا وتكرارًا مدى قدرتي واستطاعتي على تجاوز كل هذه الصعاب، بفضل الله ثم بفضلهم اجتزت هذه السنة الثقيلة على كاهلي، كونها سنة تحدد المصير، وبناءً عليها يُبنى مستقبلي المشرق -بإذن الله- 

بتواجهوا أشخاص سلبيين في حياتكم، بس يحطموكم من داخل..هذا صعب، هذا مانفهمه، الدكتورة ماتشرح زين، لو منسحبة من الجامعة أفضل..يمكن أجيب F ، يمكن ما أستوفي الشروط الكلية اللي أبغاها والكثير الكثير! 

أرجوكم اسمعوا الشيء الطيب، اللي يخليكم تستجمعوا قُواكم وتبذلوا أقصى جهدكم - بِحُب - وتجاهلوا كل كلمة ممكن توقع وقع سيء على دماغكم، على حماسكم ، على أهدافكم..إسعى لوحدك، عشان الآخرين يسعوا معك 💗

في الأخير " أفضل انتقام، أن تنجح بشدّة." 

بحط لكم صور لمرافق الجامعة ساعدتني في أوقات الفراغ أذاكر في هدوء بدون ضجيج الطالبات 

بكون عندكم بريكات واجد أوقات يكون عندي بريك من 10 لين 3 العصر فأستغله في المكتبة أذاكر أو أترجم المحاضرات ، أخلص واجباتي ، أكمل عرض البوربوينت مثلًا وهكذا 

أتمنى تستغلوا المكتبات المتوافرة في الجامعة ، عندكم مكتبة كلية الطب أقرب مكتبة لمبنى 300 ولكن - ماجربتها - أو مكتبة كلية التصاميم ، بتكون أقرب بعد ليكم كونكم بتمروا من الجسر اللي يربط بين مبنانا وكلية التصاميم ، أو الخيار الأفضل والأكبر ومصادر متعددة عندكم المكتبة المركزية اللي أرفقت ليكم بعض من الصور ليها .. كانت هادئة دائمًا بإمكانكم تذاكروا في أي وقت يفتحوا من 8  الصباح  - 2 الظهر حسب علمي في الايام الاعتيادية ، لكن في أيام الفاينل كان لين الساعة 4 العصر . 

الجميل في المكتبة المركزية إن تقدروا تاخذوا غرفة - زجاجية - تسع لعدة أشخاص تذاكروا انتون واصحابكم، وتتناقشوا وتشرحوا لبعضكم اللي ماتفهموه ، أو مكاتب مفتوحة ، أو غرفة مستقلة صغيرة تسع لفرد واحد للي مايحب يذاكر جماعي أو بصوت عالي 

متوفرة الأجهزة الحاسوبية فمو شرط تاخذوا أجهزتهم المحمولة بالإضافة فيه عدة كتب تخدم كافة التخصصات المتوافرة في جامعتنا لمن يحب الاطلاع والإفادة 

وهذا والله ولي التوفيق .. استمتعت جدًا وأني أنقل ليكم تجربتي في هذه السنة ، أتمنى تستفيدوا وتستمتعوا وأعتذر جدًا لو أطلت عليكم ولكن عشان تستفيدوا بأكبر قدر ممكن واكون مستوفية لعدة أشياء عشان تكون حاضرة على بالكم ، إشملوني في دعواتكم الطيبة لي ولعائلتي. ☁

أسأل الله أن يكتب لي ولكم الخير ويرضِّنا به ، اللهم افعل بنا ما أنت أهله .. ولا تفعل بنا ما نحنُ أهله 🍃

"نحنُ لنا لهفة التمني والسعي ولله سر الإجابة وسر التوقيت وسر الدهشة." ⛅

زينب عبدَالله.