سنَة ثانية | تمريض

"ليسَ مهمًا نوع المضمار الذي تسلكه، لكن إذا خضتَ مضمارًا

 فكُن بطلَه." 

أنهيت السنة الثانية في تخصص التمريض في جامعة الامام عبد الرحمن بن فيصل | ( الدمام سابقًا ) . 

بدايةً لا تسمحوا لأي شخص إن تسوَّل له نفسه بإنه يستنقص من هذا التخصص في حال لو كان المجتمع والأشخاص اللي من حولكم عندهم فكرة مغلوطة عنه، كونوا - أنتم - من يصحح هذا المفهوم ، التخصص عظيم و جبّار و بحرٌ فائِض بمعلوماته و مُمتع لمن لا يحبذ الروتين والدراسة على نفس الشاكلة طيلة سنوات دراسته.  يحتاج لمجهود مبذول وقبل كل هذا يحتاج لشخص يُخلِص له لطالما قالوا : " التمريض يختار أهلَه."

لا تتراخى الأيام تنتظرك!

المستوى الثالث | 

• Fundamental of Nursing | أساسيات التمريض . 

هذه أهم مادة بالتخصص ليش؟ لأن التخصص معظمه يتمحور حوله هي القشرة و اللُب حق التخصص لذلك عليها 6 كردت بالمعدل يعني هي اللي ترفعه وهي اللي تنزله .. فعطوها حقها من البداية ، المادة ممتعة والستاف حقها أغلبهم لطيفين - لاتاخذوا بتجربة أحد في حال لو أحد موقف من هذه المادة أو استصعبها أو أو - تقدروا تجيبوا فيها قريد عالي وبسهولة جدًا تحتاج بس إلى جهد أكبر وتركيز أكثر . 

ندرسها نظري وعدنا مد تيرم واحد و فاينل و عملي في اللاب كل إسبوع يكون عندنا بروسيجر ندرسه ونطبقه وبعدين نختبر فيه فيه حاجة إسمها OSCE فكرته إنه اختبار عملي يجبوا لش مثل case حق البيشنت وكيف بتتصرفي وياها؟ مثلًا كيف تسوي range of motion للبيشنت وعدة أشياء ثانية بتطرقوا ليها متى نختبره؟ نختبره قبل ماننزل المستشفى ونهاية السمستر مو صعبة تجيبوا فيه درجة عالية إحنا كانت الدرجة من 10 تدربوا واجد ، ركزوا على أبسط الأشياء مثلًا بعضهم كانوا يدققوا علينا حتى لما نعقم الستيثوسكوب وكنا ننقص لو سويناها غلط ، حاولوا تعرفوا كل شيء قبل الاختبار ولا تتوتروا لأن هذا ما بساعدكم بعدين . 

المحاضرات بدرسوكم أكثر من دكتورة \ مس وكل وحدة مسؤولة هي اللي تحط أسئلة الاختبار الخاصة بجزئيتها . 

الكوردنيتر حقي كانت د. سحر .. أعتبرها أم تخاف علينا وتحاتينا لو احتجتوا لشيء لاتترددوا تسألوها أو تطلبوا منها المساعدة.

  

• Anatomy and physiology | علم التشريح و وظائف الأعضاء . 

المادة عليها 4 كردت بالمعدل نختبر 2 مد تيرم و فاينل بالترم الواحد  و تطرق المادة لدراسة جسم الانسان من أصغر خلية إلى حيثما يتكوّن بأكمله  يعني نشوف تشريح الجسم وندرس عنه نظري وعلمي في لاب في مبنى الطب وبعدين نتعلم إيش وظيفة هذا الشيء وكيف يعمل ببساطة في الوقت ذاته. 

المادة تحتاج لجهد كبير وتركيز عشان ماتتعبوا بعدين في استذكار معلوماتها وربطهم فيما بعض حاولوا تذاكروها أول بأول عشان يسهل عليكم مذاكرتها أيام المد تيرم وتقسموا فيما بينهم . 

هذه بعض الابكليشنز اللي فادتني وكنت أرجع ليها في حال ما عرفت مكان الشيء في العضو أو الجثة وخصوصًا إذا كان صغير 

• Biochemistry | كيمياء حيوية 

المادة عليها 3 كردت بالمعدل ، 2 مد تيرم و فاينل بالترم الواحد الستاف حقها لطيفين ندرسها عملي في مبنى الطب و نظري  اللاب حقها ممتع بتجربوا أشياء جديدة زي سحب الدم مثلًا . حاولوا تذاكروا المحاضرات بحيث ماتهملوها لين وقت الفاينل لأن كميتها طويلة نوعًا ما . 

• Microbiology | الاحياء الدقيقة و الطيفيليات .

المادة عليها 2 كردت بالمعدل ، 2 مد تيرم و فاينل بالترم الواحد ،  ندرسها نظري فقط تتطرق في دراسة البكتيريا والفايروسات وعدة أنواع أخرى تسبب الأمراض في أجسامنا وعن طريق إيش؟ وكيف ممكن تنتقل؟ وإيش إسمها تحديدًا؟ وهل البكتيريا الوحدة تقدر تصيبنا بأكثر من مرض ؟  معلوماتها كبيرة جدًا وتحتاج إن تربطوا فيما بينهم  وتسووا هايلايت على الأشياء اللي تركز عليها الدكتورة وتنتبهوا واجد بالشرح ، المادة كانت ممتعة رغم غلستها لأن الدكتورة شرحها لا يعُلى عليه . حاولوا تجمعوا درجات فيه من البداية .

• Islamic | النظام الاقتصادي في الإسلام . 

نحفظ فيه سور من القرآن منها ( المرسلات ، الانسان ، القيامة ، المدثر ، المزمل ، الجن ) 
التسميع من 10 درجات حاولوا تسمعوا من الأسابيع الأولى لنقطتين ، قبل ماتجي زحمة الاختبارات وتنشغلوا وتنضغطوا ولأن فيه بعض الدكاترة يعطوا بونس للي يسمع من البداية فحق تستفيدوا من كلا الأمرين. 

وأيضًا ندرس محاضرات ويكون فيها مد تيرم واحد و فاينل ومشروع . 

"إن هذا الوقت ماضٍ حلكَة الأيام تأفَل." 

المستوى الرابع | 

"فليس يجني من ثمار الفوزِ يانعةً 
من جنةِ العلم إلا صادقَ الهمَمِ."

كنت متحمسة جدًا للترم خصوصًا عشان الدوام بالمستشفى ٬ تجربة جديدة \ روتين جديد . 

المستوى هذا يتطلب تنظيم وقت بشكل مستمر! لأن كل دقيقة احنا بحاجتها فترة المد تيرم تداهمنا في آيام وجيزة مع دوام و متطلبات المستشفى فلا تتهانوا ابدًا بكم وحاولوا تستغلوا البريك حتى لو بأشياء بسيطة . 

بندرس بعض المواد اللي درسناها في الترم الأول ( تكملةً لها ) فما بكون الموضوع غريب عليكم بس في هذه النقطة استفيدوا من اغلاطكم في هذه المواد وتفادوها في هذا الترم بحكم صارت عندكم فكرة عن طبيعة المقرر و اسلوب الستاف . 

"ترجو النجاة ولم تسلك مسالكها 

إن السفينةَ لا تجري على اليبسِ." 

مواد المستوى الرابع |

• Fundamental of Nursing | أساسيات التمريض . 

المحاضرات بندرسها كل اسبوع و الوضع طبيعي العملي كان خفيف من ناحية البروسيجرسز ومعظمهم مرتبطين ببعض مثل ( IM - ID SI )  كيفية حقن الابر وكل ابرة لها عضلات معينة نحقنها فيها و إيش التعليمات اللي نسويها قبل ، الشعور كان رائع جدًا و حسيتني كبيرة

سوينا مشروع للمادة في الجامعة  كان عن |  الاسعافات الأولية 

كان فيه دورة عن الاسعافات الأولية أيضًا في احدى المدارس كانت عن طريق ترشيح بعض اسماء الطالبات و كنت ضمنهم . في حال لو اتاحت ليكم الفرصة لا تضيعوها لأن فيها شهادات و هذه الشهادات بتفيدكم مستقبلًا في الـ  CV . 

* قبل مانزلنا المستشفى سوينا تحاليل حق نعرف كم تطعيمة نحتاج قبل ماننزل المستشفى لازم كل تطعيمة تاخذوها بوقتها ولا بتنعاد كل التطعيمات من جديد . 

 وقتها تعودت آكثر على الـ OSCE f  لا تحاتوا الوضع بكون مرتب أكثر إن شاءالله و يوم ثاني رحنا زيارة للمستشفى الاسبوع اللي بعده داوم مستشفى يومين بالاسبوع الأحد و الإثنين طبيعة الدوام من ٨-١٢ عملي بعدين من ١-٢ على حد علمي متطلبات المستشفى اللابكوت اهم شيء مايكون قصير و ضيق بالاضافة بعض المسات كانوا يعلقوا على الشرابات اذا قصيرة و تبين من تحت السكراب - جزمة بيضاء أفضل تكون جلد لأن كانت تت،صخ مع المطر ، الاوراق تقريبٍا 3 ، وحدة حق ادوية البيشنت و وحدة نكتب فيها النوت من اول ما نشوف البيشنت لين ما نطلع عنه و ورقة هي اللي نسوي فيها فحص للبيشنت من  head to toe . 

بتسووا برزنتيشن بالمستشفى بكون فيه قروبين كل اسبوع تقريبًا . الاوراق تسلموها بناءً على الانستركتر بس حاولوا تخلصوهم في مشوار السيارة \ البريك عشان تتفرغوا في البيت للمذاكرة . كان عدنا عدة روتيشنز و أقسام نداوم فيها والحليو بالموضوع على سنتنا خلونا نداوم حتى بقسم الـ Ortho (العظام) . 

تذكروا إنكم وسيلة من وسائل رحمة الله على هذه الأرض ، قبل الدوام خلوا نيتكم تكون ( عيادة المريض ) للثواب والأجر ، دوام المسستشفى صحيح شاق و متعب و مُجهد لكن كل هذا يضمحل لما تحصلوا دعوة من مريض ، يفضفضوا ليكم و يحسبوكم فرد من عائلتهم ، يخلي المرء يتفكر كيف الله من عليه بالصحة و العافية ولم يكترث بينما غيرك يفتقر لها . 

ابتسموا في وجوه المرضى \ سموا عليهم ، قولوا ليهم كلمة طيبة قبل ما تخرجوا من عندهم ماتدروا كيف بتأثر في بقية يومه ، حاولوا تاخذوا و تعطوا وياهم افتحوا ليهم قلبكم . 

"سمعت دعوات صادقة في المستشفيات أصدق من كل المساجد."

• Anatomy and physiology | علم التشريح و وظائف الأعضاء . 

نفس نظام الترم الأول لكن هنا بدأنا نتعمق أكثر يحتاج تركيز و لا تراكموا المحاضرات خصوصًا ان بعضها يحتاج فهم 

سجلوا المحاضرات و اسمعوها تخليكم تذكروا اشياء غفلتوا عنها وقتها او سؤال نبهوا عليه الدكاترة وما شابه - بالنسبة في اللاب اتركوا الخوف على جنب و تحسسوا الاعضاء و الجثث حق تثبت المعلومة براسكم عشان بعضهم متشابهين جدًا اللهم في اختلاف لما تلمسوهم حق تعرفوا الفرق . 

• Nutrition |  التغذية . 

مادة خفيفة لطيفة بمعنى الكلمة عليها ٢ كردت بالمعدل، نظري فقط بدون لاب المادة ليها فائدة حتى على الصعيد الشخصي وفي جوانب الحياة الستاف حقها تقريبًا نفسهم ستاف البايو كمستري وكنا متعودين عليهم وعارفين اسلوبهم ، الاسئلة كانت سهلة المادة فعلًا - عسل - عدنا ٢ مد تيدم + فاينل .

• مهارات التدريس | Teaching Skills . 

المادة عليها ٢ كردت بالمعدل ، نظري فقط بدون لاب . نتعلم فيها كيف نتعامل مع البيشنتز مثلًا اللي ما يعرفوا يقرأوا ، كيف نسوي ليهم استراتيجيات تناسب مدى استيعابهم و فهمهم ، المادة جميلة بالنسبة لي ، لاتاخذوا برأي البقية في حال استصعبوها او من هذا القبيل ، ذاكروا وسووا كل الا تقدروا عليه وتقدروا تجيبوا فيها قريد عالي مو صعبة صدقوني سوينا فيها اسايمنتز عدنا مد تيرم واحد من ٢٠ و فاينل . 

• Pathology |  علم الأمراض . 

نظري فقط ، ما عدنا لاب .. ندرس كيف المرض يصير بجسم الانسان ، كيف الجسم يتفاعل و يقاوم مع المرض المادة لو نتعمق فيها نستعشر مدى عظمة كل الاشياء اللي تصير داخل جسمنا . عطوها حقها ، في حال ما فهمتوا بالمحاضرة لا تتأزموا اعتمدوا وقتها على الـ self study .  الحليو بالمادة ان عليها ٢ كردت بالمعدل . عدنا ٢ مد تيدم + فاينل و سوينا اسايمنتز . 

•  Islamic | النظام السياسي في الإسلام . 

السور اللي حفظناها : ( الملك - القلم - الحاقة - المعارج - نوح ) 

سمعوا قبل الاسبوع الثاني لأن بعدين دوام مستشفى و زحمة و ضغط بصير . البعض كان يختبر ورقي لكن هذا بكون قبل الفاينل بشوي وأحس الوضع متوتر و بكون الواحد مشتت ذهنه . 

سوينا برزنتيشن و درستني د. سلوى كانت طيبة جدًا و تراعينا . اختبرنا مد تيرم واحد و فاينل . 

النهاية | 

"لا تركن إلى الأوقات الصعبة، ولا تعوّل على استمراريتها، إنها موقتة، عابرة..لن تطيل المكوث، تحط رحلها هنا أو هناك ثم ما أن تلبث تغادر بعيدًا، وفي أعقابعا يأتي الفرَج." 

عيشوا كل مرحلة بتفاصيلها ، لا تستبقوا الأحداث ولا تسمحوا لمواقف صغيرة تأثر علر مسيرتكم في الدراسة و الحياة . 

حين تصل ستعلم أن الطريق كان أجمل من الوجهة، و أنك ما حييت ستظل تسرحِّ بصرك مستردًا لياليها .. عش تفاصيل وجهتك.* 

أتمنى أفدتكم و لو بالقليل .. 

ولا تنسوني من صالح دعواتكم بالتوفيق في بقية مسيرة حياتي . 

"لا تلتفت 

ألقِ البذور على مُضيّك

اللهُ يكفل في الحياةِ نماءها..

كم بذرةٍ أُلقيَت في ماضي سنينك

و اليوم

تشربُ دونَ وعيٍ ماءَها."

زينب عبدَالله.